Chin ramkulh, Mindat khawpi cu ralhrang tlunzuangraldo vanzam in mani May 8 zianglam le zanlam ah bomb a thlak lala ruangah tualsungmi nunnak liam le hriam tuar an um thu le cennak inn thenkhat a siat ral thu pawl theih asi.
Mani May 8 zinglam nazi 7 hrawngahkhan ralhrang tlunzuang raldo vanzam cun Mindat khawpi nisuahnak lam hmun pakhat ah voihnih rori bomb a thlak hnu, zanlam nazi 12:45 hrawngah a tumhnihnak bomb a thla bet thu Mindat tualsung thuthang hram cun an rel.
Cule a tumhnihnak hrang zanlam nazi 12:45 ih a thlakmi hi cu meialh bomb le Energy sang zet nei bomb pawl an sivekin tualsung mipi nunnak liam an um vekin cennak inn thenkhat pawl khal an kangziam thu pawl le tualsung mipi nunak liam pawl cu thuhla felfai zingzawi rero lai asi tiah theih asi.
Mindat khawpi hi kum 2024 kum cem zawngahkhan CDF-Mindat le a tanrualpi pawlkom pawl in ralhrang kutsungih ta an rak lakfel mi khawpi a siih, cutin Mindat Township People’s Administration cun thuneihnak thar thawn hmalaknak pawl fehpi rero asi thu pawl khal theih asi.
Cutin tunai ihsin SAC ralhrang cun Chin ram le Magway ram ritawknak ih hmunram pawl ahcun leilam ralhrang thazang pawl kuat bet in doawknak pawl khal a um rero laifang asivekin ralhrang tlunzuang raldo vanzam hmang khalin bomb thlaknak pawl cu a hlanhnak in a hamng nasa tlang tiah theih asi.
