Myanmar ram cu fur ruahti tam can a thleng zik rero thlang asinan, ralhrang council ih hmunramnawrnak pawl cu cawlh lam silo in, tuhnak ih nawr deuhdeuh ding sawn dingah ralhrang hruaitu thar ရဲဝင်းဦး cun thu a pe ti asi.
Tulai dothlengtupawl ih khawpi lakdo baihpithlaknak pawl nasaten fehpi rero asiih, ralhrang cun ruahtii tam ruang menah doawknak cawlhsan simaw, malter simaw cu an tum hrimhrim lo cuhnak in tuhnak ih nasa sin in do ih nawr dingih fial an si thu theih asi.
Cuhleiah, Fur canih doawknak pawl ih hman ding tipuan kawr, ralthuam meithal cerek, ei-in, sivailam tipawl cu tuihsi rak khawm cia dingah ralhrang hruaitu thar ရဲဝင်းဦး cun a fial thu khal theih asi.
Cuihsin, Fur can ah cantha la in dothlengtupawl in ralhrang sakhan pawl le khawpi pawl cu olsam zet ih an lak kir sal thei lonak dingah kilhimnak lam khal ahleice in hngetkhoh zet ih tuah dingah a fial bet ti asi.
Cule ralhrang pawl in an doawknak thiamnak ṭhansohter ding thu le santhar ralthuam hmandan pawl khal thiam dingah le leitlun huap doawknak pawl cu an zir ih an thiam a ṭul, tiah ralhrang Uktu thar Ye Win Oo cun a ti.
Ralhrang Ye Win Oo hi ralhrang hotu Min Aung Hlaing hnen ihsin March 30 ahkhan ralbawi sinak hlan a rak si zo ih tuahhin Myanmar ralhrang pawl uktu thar a si vekin thu nei zet in thu a pe thettho asi.
