Chin ramkulh, Kanpalet khawpi hmun pakhatah mani May 24 zarhpi sun ahkhan Kalaymyo ralhrang Tada U Air Force ihsin ralhrang tlunzuang raldo Jet vanzam 2 cun voi 4 rori bomb a thlak thu tualsungmipi hnenin theih asi.
Tualsungmipi pawl reldan vek asile, ralhrang tlunzuang raldo Jet vanzam 2 cun zanlam nazi 12:22 le zanlam 12:34 karlak ah bomb voi 4 an thlak ti asi.
Cutin ralhrang tlunzuang raldo jet vanzam 2 bomb thlaknak ruangih siatnak pawl um le umlo cu thuhla fiangfai theih asi hrihlo ti asi. Cule tualsungmipi pawl cu a cangthei tawkih ralhrang tunzuang raldo vanzam pawl lakihsin ralring theibik ih um dingah dothlengtu pawl lam khalin theih ternak an nei bet.
Cuihsin, Matupi khawpi sehvel khalah mani May 24 zinglam nazi 8:30 hrawng ihsin nazi 10:30 tiang nazi 2 sung rori ralhrang tlunzuang raldo Jet vanzam le Y12 in bomb thlak ih an do thu khal theih asi.
