Chin ramkulh, Kanpalet khawpi kiang naiah mani May 21 zinglam ahkhan hmunramnawr ralhrang pawl le dothlengtupawl nasaten an doawk thu le ralhrang tlunzuang raldo vanzam khalin a do bawm thu theih asi.
Ralhrang council hin Chin-Magway ritawknak Yaw hmunram Saw khawpi ahcun Lawngshe lam ihsin kandungzarh ihsi khan ralhrang thazang tamzet a kuat bet hnu, Saw khawpi ihsin Kanpalet khawpi cu May 17 ni ahkhan an rak nawr thawk ti asi.
Cutin tuah hin hmunramnawr ralhrang pawl cu Kanpalet hawpi ihsin peng 6 hlatnak ah an thleng zo thu le Kanpalet khawpi sung hmunkhat ah cun mani May 21 zinglam nazi 6 hrawngah khan ralhrang tlunzuang raldo vanzam cun bomb 4 rori voikhat tlak ih a thlak thu khal theih asi.
Chin – Magway ritawknak ih um Kanpalet khawpi hi CDF-Kanpalet pawl ih thununmi hmunram asi thu le tuihtum doawknak ahhin dothlengtupawl hrangah sumpai le thlacamnak thawn in rak bawm hramuh tiah Kanpetlet Township People’s Administration cun ngennak an neih thu pawl khal theih asi.
