Chin ramkulh, Falam peng, Lungpi khua kiangnaiah hmunramnawr ralhrang pawl ih thahmi dothlengtu ralkap 2 le tualsungmi mipa 2 pawl ih ruak cu May 27 niahkhan hmuh ngah asi thu Falam peng tualsung upapawl le tuanvoneitu pawl hnen in theih asi.
Hmunramnawr ralhrang pawl ih thahmi tualsungmi 2 hicu Lungpi biak inn kiangnaiih ceng kum 30 mi hrawng U Duh Lian le U No Hnin timi an si thu le Falam khawpi sehvel ih doawknak a nasatzet laiah khan hramlak ih ral an tlannak lamah hmunramnawr ralhrang pawl in an kaingah ih rapthlak zet in an thah ti asi.
Cuihsin hmunramnawr ralhrang pawl in CNA armband bun uniform hruh Chin dothlengtu ralkap 2 khal an kaiih a rapthlak theibik in an hngawng an tan sak ti asi.
Cule Chin dothlengtu ralkap 2 ralhrangin an thah mihi Chinland council ih ralkap an si ti cu a fiang ko nan, CNA maw, CDF sawnsaw an si timi theifiang dingah zingzawinak neih rero lai asi.
Hmunramnawr ralhrang pawl hin a rapthlak theibik ih an thahmi mi 4 pawl ih ruak hi zinsir tisia luankawr pipe sungah an hlawn thu le Falam peng tualsung upa pawl le tuanvoneitu pawl in May 27 niahkhan an ruak cu va la in thaten vuiliamnak an neih thu pawl khal theih asi.
