Sagaing ramthen, Kalay Myo zinpi tawnkhawmnak ih zinkel pawlah mani May 12 zing nazi 6:05 hrawngih sikhan ralhrangpawl cu relh in tualsung mino kaihding an rak bawh tiah theih asi.
Cutin tualsungmipi pawl cun ralhrang pawl ih relhnak hmun pawl cu hel thei dingah a cangthei tawk in khat le khat sim than awknak pawl an nei ve ti asi.
Tualsung pacang pakhat cun tulai cu khawpi sungah kaihkhihnak pawl a um rero. Ralhrang hin mino deuhdeuh pawl batin kaihkhihnak an nei tiah a rel.
Cule Kalay myo sungah hin tuithla ihsithawk in ralhrang hin kaihkhih cangvaihnak pawl an nei nasa sinsin ih, ralram kuat ding ralhrang mithar tuan hrimternak pawl cu nasaten an fehpi sinsin asi tiah tualsung mipawl cun an rel thu khal theih asi.
Curuangah lohtheihlo dinhmunih vasuah na tul a sile a cangthei tawkin ralring aw. Cule na umnak hmunram sehvelih thuthang pawl theih tum ringring aw tiah ka lo cah duh.
