Magway ramthen, Pakokku peng ralhrang Infantry Battalion (252) based ihsin ralhrang 2 cu dothlengtu pawl hnenah tlan lut ih an apawk thu Pakokku Township People’s Defense Organization – COBRA ONE cun mani May 24 ahkhan an phuang.
Ralhrang No. (101) Infantry Division Headquarters hnuaiih um ralhrang Infantry Battalion (252) ih ralhrang pakhat ဝင်းသန့်နိုင် an timi cu May 23 ahkhan dothlengtu COBRA ONE Pakokku pawl hnenah tlanlut in a ap-aw ti asi.
Cule ralhrang Infantry Battalion (252) ih ralhrang tuan hrim termi pakhat ကျော်ဇောထွေး an timi pa khal March thla 21 ahkhan COBRA ONE Pakokku pawl hnenah tlanlut in a rak ap-aw ti asi.
Cule dothlengtupawl hnenih tlanlut ralhrang pawl ih reldanvek asile, ralhrang council hin ralhrang tuanhrimtermi mithar pawl cu Rakhine ram doawknak hmunah kuat an si hleiah, ralhrang thazang daihawk lonak ruangah ralhrang council cun tualsung mino pawl cu ruhlo in ralhrang tuandingah a khawm ih, an duhnahramlon training a kai ter hnu, doawknak hmunram pawl ahcun hmainawrtu ah a kuat thu pawl an rel.
Cutin, hi thuthawn pehparin tualsungmino pawl cu sukso an vahsuah can ah ralhrang pawl ih ruk hloh mi le kaihngah mi an silonak dingah ralring dingah Pakokku Township People’s Defense Organization – COBRA ONE cun forhfial nak an neih thu pawl khal theih asi.
