Chin ramkulh, Tedim – Rihkhawdar pehtlaihawknak zinpi cu bikhiah nei ih ong tlang dingah CDF-Hualngo cun mani May 21 ahkhan thu suah an tuah.
Rihkhawdar khawpi kilhimnakding hrangah kilhimnak lam tuanvo lakthawk a sivekin Tedim – Rihkhawdar pehtlaihawknak zinpi cu bikhiah neiih on le khar a si thlangding ti asi.
Hi zinpi hi zinglam nazi 6 ihsin zinglam nazi 10 tiang, zanlam nazi 5 ihsin zan nazi 9 tiang tiah bikhiah neiih ong le khar a si dingih, culo hmuah kha cu pahtlang sian a si hrimhrim lo ti asi.
Cule hi an thusuah ahhin mawtawpipawl, pravite mawtaw, bike, ke feh pawl tiangin a huam theh tiah theih asi.
Hmunram sungih kilhimnak tuanvo hmalaknak pawl kimcang zetih theh asi tik lawngah tuhlan vekin a kel ten hi zinpi tluan hi ongsal asi ding tiah theih asi.
Cun bikhiah can pawl thlun duhlo ih sukso vak pawl ruangih a racang sual mi pawl cu kan nih CDF-Hualngo pawl cun tuanvo kan laksak lo ding asi tiah theihternak an neih thu khal theih asi.
Falam khawpi cu ralhrangin an thunun salhnu, India-Myanmar No, 2 ramri pursumleilawnnak sakhan umnak Rihkhawdarkhawpi cu ralhrang council cun thunun a tum ruangah ralhrang pawl cun hmunram an nawr thawk lala timi thuthang cun tualsungmipi tamsawn cun khua suahsan in India ram lam ah an tlan lut rero zo a si.
