သထုံ District, Bilin pengsungih ralhrang Win Ta Pan military base cu Karen National Union (KNU) Brigade (1) le a tanrualpi pawlkom pawl in laktum in nasaten an donakah ralhrang cun May 4 ahkhan paramotors 2 hmangin Win Ta Pan khua cu a do hmaisa ta ih cutheh in sun nazi 11:45 hrawngah tlunzuang raldo vanzam Y 8 cun ralhrang Win Ta Pan military base ih ralhrang pawl hmanding thilri le rawl a vun thlak thu le sundir le zanlam khalah Y8 cun a vun thlak bet thu KNU Thaton District cun an phuang.
Hitum ralhrang thlakmi ralthuam pawl lakih bomb te pawl 1 le cerek mu 18000 cu KNU tangrual pawl in an rak lawngsak ngah thu khal an phuang.
Cule ralhrang Win Ta Pan military base bawm dingih thlahmi ralhrang rual pawl khal in Win Ta Pan khuasung cu ralthuam tumlete hangin an vun kap bawm thu le ralhrang raldo vanzam Y8 in a tumthumnak thilri a thlak hnu reilo ah Win Ta Pan khuasung an thleng ve cih ti asi.
Cutin ralhrang khuasungih lut pawl cun tualsungmipi cennak inn pawl cu an nawk cih siko, cule ralhrang hin tlunzuang raldo vanzam hmangin siseh, ralthuam tum le te hmangin siseh, drones siseh, Parachute tipawl hmangin nitin Win Ta Pan khua le ကျောက်ဖျာ khua pawl cu a kap ih bomb a thlak cawl lo tiah theih asi.
