Sagaing ramkulh, Kata ihsi ralhrang mawtawpi 3 toih poksuak ralhrang pawl cu ကသာ le နဘား zin karlak ih um ပင်းမလွတ် khua kiangah mani May 24 zinglam ahkhan KIA le KPDF tangrual pawl in an rak donakah ralhrang 13 an thih thu le ralhrang ralthuam phunphun thahnem zet an lawngngah thu Kachin ralram thuthanghram cun an phuang.
Tufanghi Kata hmunram sungah doawknak a nasat laifang asiruangah doawknak hmunram sungih um zin pawl cu zawhlo dingah Kata District Command Office cun mani May 24 ahkhan tualsungmipi pawl theihternak an nei.
Cule ralhrang council hin tualsungmipi ta asimi mawtaw pawl le khualtlawngphur mawtaw pawl cu cei danglam in ralthuam pawl a phur ter theu ruangah ထီးချိုင့် ၊ ကသာ ၊ အင်းတော်-နဘား ၊ မော်လူး ၊ နန့်စီးအောင် zintluan cu zawh nawn hrih lo ding khal in Kata District Command Office cun mani May 24 ahkhan khualtlawngmipi pawl theihternak an neihcih thu pawl khal theih asi.
Cule hi thu suahmi thawn pehparin a tualsungmipi pawl siseh, khualtlawng sukso vak pawl khal siseh, siatnak an parih a thlengding an phang sak ruangah an thusuahmi cu thlunsak hramhram dingah an ngen thu le an thlun duhlo ih siatnak an tongpang a sile mawh an phurhsak loding thu le zinpawl cu zawh theih dinhmun ih a dingsal tikah a tharin an theihter sal ding thu pawl khal Kata District Command Office cun an phuang.
