Chin ramkulh, Tonzang khawpi ah May 17 zanlam ahkhan ralhrang tlunzuang raldo vanzam in bomb thlak ih a do hleiah, leilam khalah kaphnih doawknak a sang zet tiah tualsungmipawl hnen in theih asi.
Ralhrang council Kalay myo တံတားဦး air base ihsin ralhrang tlunzuang raldo Yak-130 vanzam le ralhrang tlunzuang raldo Jet vanzam pahnih cun May 17 zanlam nazi 1:18 hrawngahkhan Tonzang khawpi ah bomb an va thlak asinan, tualsungmi thi an um loh thu le cennak inn thenkhat cu siatsuahmi a um ti asi.
Hitum ralhrang tlunzuang raldo vanzam 2 in bomb an va thlaknak ruangi tualsung mipi thile hriamtuar an um le umloh siseh, cennak inn siatsuah mi thuhla khal thei asi hrih lo ti asi.
Cun May 15 nikhalahkhan ralhrang tlunzuang raldo Jet vanzam cun Lomzang khua khalah bomb 2 a thlak ti asi.
Tonzang khawpi lathei dinghin ralhrang le atanrualpi ZRA pawl cu bur thum ah then darh aw in hmunramnawr ih dotum an sinan lamlak ah dothlengtu tangrual pawl cun an rak khamih an rak donak ihsin kaphnih karlak doawknak a nasa zet ti asi.
Tuahhin Lomzang khua le Vialcian khua kiang hmunhnih tukah doawknak a um ti asi.
Kaphnih doawknak ahhin thi cu an um veve ti asi. Cule Tonzang doawknak ahhin Chinland council thawn tangrual Zo Army ihsin Tg. Suan Khup an timi cun ramle miphun hrangah a nunnak a liam ti asi.
Cuihsin, Chin ramkulh, Cikha khawpi khalah a hlanih ralhrang pawl hmun rak khuarnak checkpoint cu ralhrang council cun ZRA pawl an pek thu le ZRA pawl cu hmunkhuar in gate an ong thu pawl khal theih asi.
