Tuluk ram, Kumin khawpi ah May 12 le 13 ih tawnkhawmlairel a voi 11nak an neihnak ahhin ralhrang council palai, TNLA hotu lu pawl le Tuluk palai tipawl an siih, cutin an lairelkhawm miah ralrhang council lam cun ပလောင် Ta’ang National Liberation Army (TNLA) pawl ih thunnunmi khawpi 4 cu TNLA pawl in thlakhat sungah suahsan theh dingah an ti thu theih asi.
Ralhrang council in suahsan dingih an timi khawpi pawl cu နမ္မတူ၊ မိုင်းလုံ၊ မိုင်းငေါ့ le Tuluk-Myanmar ramri ih um နမ့်ခမ်း khawpi tipawl an si thu theih asi.
Tuluk ramriih um Myanmar lam hriamkai pawl thawn lairelkhawmnak pawl ah ralhrang council lam cun 2008 daan hrampi vekin hmunram thuhla pawl ah cun TNLA pawl cu Palawng mahte ukawknak hmunram asimi နမ့်ဆန် le မန်တုံ khawpi lawng pe dingah lungkimnak hminkhen an rak nei tiah thuthang hram pakhat cun a rel.
Cun hi tawnkhawmlairelnak an neih hlan ni ahkhan TNLA cun ralhrang an rak kaihmi mipum 100 lai cu ကျောက်မဲ khawpi ralhrang kutah an rak pek kir sal thu le an thalh mi pawl lakah hin ralhrang No. (101) Infantry Division Headquarters ih Brigadier General Min Min Tun an timi khal a tel ti asi.
Cule aliam cia 1027 Operation ahkhan TNLA in an rak lakfel zomi khawpi နောင်ချို၊ ကျောက်မဲ le သီပေါ khawpi pawl cu nikum ahkhan Tuluk ram rak hrawlhawknak ruangah ralhrang council kutah a rak pe kir zo ih, tuah ralhrang council ih dil salmi khawpi 4 hi cu a pek ka zum lo ziangah tile kaphnih doawknak thawk dingah an timtuah rero sal a bang tiah thuthang hram cun a rel thu khal theih asi.
