Magway ramthen, Pwint Phyu peng hrambun local defense force PDF Battalaion member thenkhat ralhrang hnenih lut pawl ruangah tualsungmi thenkhat ralhrang kaihkhih an tong rero asi tiah tualsungmi thenkhat in an rel.
Minbu District No, 4 Battalion ih ralkap pakhat cu ralhrang hnenih a tlan luh ruangah tualsungmi 7 pawl cu Minbu District No, 4 Battalion thawn pehtlaihawknak nan nei asi tiah ralhrang in an kai ti asi.
Minbu District No, 4 Battalion ih PDF ralkap pawl hi tlansuak an tam ti asi. Tuihkum January thla ahkhan meithal zun 3 thawn mi 7, May thla sungah hin meithal zun 3 thawn mi 4 tipawl cun ralhrang belin ralhrang hnenah an tlan lut ti asi.
Cutin tuih May thla sungih ralhrang hnenih PDF mi 4 an tlanluh ihsi reilo ah tuvekin ralhrang pawl cun tualsung mipi thenkhat kaihkhihnak pawl cu an thawk cih ti asi.
January thla ih mi 7 ralhrang hnenih an tlan luh tum ahkhan ကျောင်းကုန်းကြီး nitlaknak lamih um khuate pawlah cun ralhrang pawl le ralhrang hnenih tlanlut mi 7 pawl hin tualsungmipi cennak in thenkhat pawl khal an urziam ti asi.
Tuvekih dothlengtu PDF ralkap tlansuak ih ralhrang hnenih tlan lut an tam vivo thlang ruangah NUG hotulu pawl in uluk zetin zingzawinak an neih a tul thlang asi tiah tualsungmipawl cun an rel thupawl khal theih asi.
