Bago hmunram, နတ်တလင်း pengsungih လယ်မအင်း khua lam panih hmunramnawr ralhrang pawl cu May 3 ahkhan dongthlengtu tangrual pawlkom pawl in ထန်းတော khua le လယ်မအင်း khua karlakah mine hmangih an rak donak ah ralhrang 3 thiin, ralhrang 2 hriampi tuar an um thu ဧရာညီနောင် column cun an phuang.
Hitum hmunramnawr ralhrang rual rak do tu pawl hi Tharyawaddy District, Battalion 3801, Company 6 – Ayar Nyinaung Column pawl an siih, thi le hlo um loten dung an sip thu pawl khal theih a si.
Bago hmunram thotho ကျောက်ကြီး(လယ်ဒို) pengsungih tlangleng zin 137 lilawnpi ih hmunkhuar ralhrang checkpoint pakhat cu Karen National Liberation Army (KNLA) in May 2 zanlam nazi 9:30 hrawngahkhan luhcilh ih an va donak ah ralharng officers 2 telin ralhrang 5 an thiih, ralhrang ralthuam thenkhat an lawngngah thu theih asi.
Hitum ralhrang donak ihsi ralthuam thenkhat an lawngngah mipawl cu meithal zun 5 le cerek thenkhat telin ralhrang ralthuam thilri thenkhat tipawl an lawngngah thu le ralhrang checkpoint ih ralhrang riahbuk deute 3 khal an urkang theh thu pawl khal theih asi.
Hi ralhrang checkpoint hi Karen National Liberation Army (KNLA) Battalion 9 Special Forces pawl ih va luhcilh le domi a si thu Karen National Union (KNU) Central Committee cun an phuang thu khal theih asi.
