Chin ramkulh, Matupi khawpi le a sehvel ah ralhrang tlunzuang raldo vanzam pawl in mani May 26 ahkhan voi 23 lai bomb thlak ih a do thu Chin dothlengtu lam cun an rel.
Mani May 26 zinglam nazi 10 hrawng ihsikhan Matupi khawpi sung le a khawpi sehvel ah ralhrang tlunzuang raldo Jet vanzam 7 in voi 15 bomb thlak ih a do thu le ralhrang tlunzuang raldo Y12 vanzam khalin voi 8 lai bomb thlak in a do ti asi.
Cutin ralhrang tlunzuang raldo vanzam pawl hin voi 23 lai bomb thlak in an do hnukhalah tlunlam ihsin Matupi khawpi le a sehvel cu thlingthlaknak nei phah in can tawkfang cu an zam kual rero lawk asi tiah tualsung upa pakhat in a rel.
Cule zanlam canher lam cun ralhrang tlunzuang raldo vanzam awn cu theih ding a um nawn hrihlo, amahlawngte ziangtik ahsaw in ra thlak bet sal ding ti ruat in ziangtiih kan um khalle kan hna kan thong hlehle ih thin a har zet tiah tualsungmipawl cun an rel thu khal theih asi.
Ralhrang tlunzuang raldo vanzam bomb thlaknak le donak ruangih siatnak um le umlo cu thufiangfel a um hrih lo ti asi.
Chin ramkulh, thlanglam ahhin ralhrang council cun ralhrang thazang thawngtel hmangin hmunram a nawr thawk lala zo ih, Kanpalet , Mindat le Matupi peng tipawl ahcun doawknak a um simaw umlo simaw tlunzuang raldo vanzam nasaten hmangin bomb khal duh thawh zetin a thlak kual zawk rero asi. Ziangkhalle Pathian in lo kilhim haihram sehlaw.
