Tanintharyi ramthen, Yee peng rahrang ခမရ 409 Infantry Regimen ihsi tlansuak ralhrang mithar lakluh mi 10 pawl cu ralhrang in an hualnak ah 3 an kah thah thu le damsuak 7 pawl cu an rak kaihngah thu တပင်ရွှေထီးကိုကျိုက် People’s Defense Force ih tuanvoneitu pakhat cun a rel.
May 13 ahkhan Yee pengsungih ralhrang ခမရ 409 Infantry Regimen ih ralhrang pawl in thahrum hmangih an vuak le velhmi ralhrang tuanding mithar mipum 10 an lakluhmi pawl cu tlansuak in an haulnak ah tlansuak mithar 3 cu ralhrangin an kahthat thu le damsuak 7 pawl cu တပင်ရွှေထီးကိုကျိုက် People’s Defense Force in an rak kaihngah ti asi.
Ralhrang mithar 7 kaihngah mi pawl hi ralhrang tuahmi zarh 19 rak thehsuak zotu pawl an siih, ralhrang in an duh nahramlon ralhrang tuandingih an kaihmi pawl an si thu le ansinak an thuhla pawl suhfiangnak an neirero lai thu pawl khal theih asi.
Cuihsin May 14 ni khalahkhan Nay Pyi Taw, Tatkong peng ralhrang Infantry Battalion 109 ihsi khalin ralhrang 4 pawl cu an duty nak ihsin zan nazi 10 hrawngah khan an tlansuak ti asi.
Nay Pyi Taw, Tatkong peng ralhrang Infantry Battalion 109 ihsi tlansuak ralhrang 4 pawl hi an Battalion hotu lu pawl zuu an rit laifang cu cuh in an duty nak hmun ihsin an tlansuak ti asi.
Ralhrang tlansuak mi 4 pawl hi ralhrangin ralhrang an tuan hrimter mi ha an si, lole hlankhan ihsi ralhrang mihlun ha an si ti cu theihfiang a sihrih lo ti asi.
Cutin ralhrang cun an hawl rero thu le mani May 15 tiangah kha cun an hawlhmuh hrih lo vekin dothlengtu pawl hnenih an ap-aw thu pawl khal theih asi hrih lo ti asi.
Cule tuikum thawk January thla khalah khan hi Nay Pyi Taw, Tatkong peng ralhrang Infantry Battalion 109 ihsin ralhrang 3 an rak tlansuak dah zoih, an hualnak ihsin 1 cu ralhrang in an kaingah sal ti thu pawlkhal theih asi.
