Russia ralkap palai pahnih cu Myanmar ram Nay Pyi Daw ah an thleng ih, Russia IL-76 cargo tlunzuang vanzam pathum khal Nay Pyi Daw vanzam tumhmun ah thilri phurmi thum dingin an thleng ve, tiah Nay Pyi Daw ralkap lam thuthanghram pakhat cun a rel.
May ni 3 ahkhan Russia ram ihsin ralthuam thawn pehparmi thuhla ah VIP Russia ram palai pahnih cu Nay Pyi Taw Airport ah an thleng thu le Sky Sky Aviator in Russia ram palai pahnih cu a rak hmuak ih an umnak dingpawl khal a rak tawlrel sak tiah theih asi.
Cule Russia ihsin IL 76 cargo tlunzuang vanzam pahnih khal May 8 ahkhan Nay Pyi Taw ih Ela Air Force Base ah pakhat hnu pakhat an ṭum ih May 9 ah an zamsuak sal ti asi.
Cuvek thotho in Russia ihsin IL 76 cargo tlunzuang vanzam cu May 15 ahkhan Nay Pyi Daw Air Base ah a ṭum ih May 16 ah Nay Pyi Daw ihsin a zam suak lala ti asi. Cutin Russian cargo tlunzuang vanzam pathum in Nay Pyi Daw ah thilri an ra phurh rero tiah theih asi.
Kum 2021 February thla ih ralhrangin thuneihnak an lawng hnu ihsin Russia cun ralhrang council pawl thawn ṭuantlangnak a karhzaiter ih. Russia thilri phurhnak tlunzuang vanzam pawl cu Nay Pyi Daw Airport le Ela Air Base ah thilri thla in an tum ih an zam suak sal theu ti asi.
