Thailand thuneitu pawl in Thailand ram, Ranong peng ih kaihkhihmi Myanmar mi hnaṭuantu mipum 90 pawl cu Myanmar ralhrang kutah an pek thu May 13 ahkhan Ranong District Immigration Department cun an phuang.
Hi an kuatkir mi Myanmar mi pawl hi Ranong Pengsung ih um le ramdangmi hnaṭuantu pawl an siih, Kaih tongtu pawl hi mipa mipum 65 le nunau mipum 25 an si ih, nauhak pawl khal an tel thu pawl khal theih asi.
Cule tuvekih Thailand thuneitu pawl in ralhrang kut ih an pek thuthawn pehparin ralhrang hin ralhrang an tuanter ding ti cu kaihmi pawl hin an phan bikmi a si thu khal theih asi.
Thailand in a ramsungah daan lo ih lut ramdangmi pawl cu kaihkhih hmalaknak a fehpi rero ruangah Myanmar mi daanlo ih lut pawl cun harsatnak an tong rero laifang khal a si.
Myanmar ramah ralhrang Min Aung Hlain in rampi thuneihnak a lawngsak hnu ramsung buainak in a khat ih, ramsung pursumleilawnnak lam a tla se sinsin ih, ramsungah hnatuan ding a har sinsin, zirnak lam khal a him lo deuhdeuh ih, hmuntin deuhthaw ah tlunzuang raldo vanzam hmangin bomb a duh duh can ah a thlak fawn, mino pawl cu a ral pawl dotu dingah ralhmaiah an duh nahram lawn a kuat ih a nawr ter fawn, cuvek pawl ruangah mino deuhdeuh pawl cun ram suahsan in nitin ei ding hawl in miram ah harnak phunphun tuarin innsang hrang an nung tento ve. Culaiah a ram neitu in daan lo ih lut an sinak vekin an rak kai ih thawng an thlak, lole ralhrang kut ah an kuat kir fawn. Kan ram mifarah ram a silo nan tuah cun ram farah bik ah miduhham lalhrot Min Aung Hlain in a can theh thlang aw.
