Shan Ramkulh saklam ih Kokang ralkap – MNDAA ukmi Kuatkhai peng ih khua pakhat ah MNDAA ralkap sungtel pakhat cun thahrum hmangih tuangsung inn pakhat a suam ruangah an khua mi pawl hmaiah nasa zetin a umnak pawlkom MNDAA cun an vua ih an hrem ti asi. Cule hi thil cang hi April 30 sunhnu ih cang asiih, hi thilthleng thawn pehpar in thuhla cipciar sawn in an zingzoi rero lai ti asi.
Cule inn neitu putar hi kutthlak asiih, a luu ihsin thihnai a suak rero ti asi. Cule a inn sung thilrii khal ruksak a si thu theih asi.
Cun hi suamhmang pa hi tualsung inn pakhat hmaiah hridai in a kut dungkhirh sak in an thlai ih MNDAA ralkap a tuanpi pawl cun mipi vantlang hmuh ah nasaten an vuak thu le a mah hringtu a nu au phah in a thil ti sual cu ngaidam dingah dil in tap phah in a au ciamco ti asi.
ကွတ်ခိုင် khawpi hi MNDAA in March thla 15 ahkhan TNLA kut ih ta an rak lawngsak hnu tuini tiang MNDAA cun an uk ti asi.
Cule Shan Ramkulh saklam MNDAA ih thunun mi Lashio peng နမ့်ဗေဒါ khua kiangah April 30 zanlam nazi 5:30 hrawngah khan kum 8 mi le kum 7 mi nauhak pahnih cu bomb pakhat a puak hrih lomi sar ngah in an khalh ih an lek rero lai cu kum 7 nauhak pate cun a ken laiah bomb cu a puak ih nauhak pate cu a hmunah a nunnak a cem cih ih kum 8 mi nauhak pate khal a hriamtuar a bese zet ti asi.
Hi siatnak thuthawn pehpar in Fimzirnak lam pawlkom pawl cun Myanmar ram ih doawknak hmun ih a um mi ralthaum puakkuai thei pawl cu nan hmu asi khalle leknak ah khalh ih hmang lo dingah forhfialnak an neih thu pawl khal theih asi.
