Chin ram, Falam khawpi ihsin Hakha khawpi lampan ih hmunramnawr ralhrang pawl cu Falam-Hakha zinpi tluan ih um khua 4 ih cennak pawl an urziam theh thu le mani May 22 ahkhan Hakha khawpi ah an luhfel thu tualsung thuthang hram pawl hnenin theih asi.
SAC ralhrang pawl cun nikum 2025 October thla ihsikhan Sagaing ramthen, Kalaymyo ihsin ralhrang thazang thawngtel thawn Chin ram, Falam khawpi le Tedim khawpi cu uksal dingah nasaten a nawr ih a do ruangah Chin dothlengtupawl thawn kaphnih doawknak thla 7 sung rei an doawk hnu, tuih kum 2026 April thlacem lam khan Falam khawpi cu an rak thunun theisal.
Cuihsin hmunramnawr ralhrang pawl cun Falam khawpi ihsin Hakha khawpi lam pan in hmunram an nawr peh vivo ih, Chuncung khua, Ramthlo khua, Laiva tikhuah kiangah zarhhnih hrawng dothlengtu pawl thawn kaphnih doawknak an neih hnu, ralhrang tlunzuang raldo vanzam khalin bomb thlak ih a do vekin, Chuncung khua, Thlanrawn, Laiva, Tlangzar khua tipawl ih cennak inn pawl cu an urkang thu le mani May 22 ahkhan Hakha khawpi sungah an luhfel thu pawl theih asi.
Hmunramnawr ralhrang pawl hin Falam-Hakha zinpitluan ih um tualsungmi thenkhat khal zarhhnih sung an kaihkhihmi pawl cu tuah cun an thlah sal zo, amahlawngte Kalaymyo ihsi an so tumih zin khihhmuh tu dingih an hruaimi mawtawpu pawl cu mani tiangah khacun ralhrang hin an thlah zalen hrih lo asi tiah Kalay tualsungmi thenkhat cun an rel.
Cun tunaiah khan Chin ramkulh, Tonzang khawpi khal ralhrang kutah a lut zo ih, tuahhin ralhrang council cun Chin ramkulh sungih Falam peng Rihkhawdar cu lak tumin hmunramnawr dingah a tim a tuah rero. Cun Chin ramkulh Kanpalet khawpi khal laktumin Magway ramthen lam ihsin ralhrang thazang tamzet thawn hmunram a nawr ruangah tuah dothlengtupawl thawn nasaten an doawk rero thu le kaphnih doawknak cun luarlam a pan vivo laihrih tiah theih asi.
