Arakan Ralkap (AA) le a ṭangrualpipawl cun May 15 ahkhan Ayeyarwady Ramkulh, Ye Kyi peng ih ralhrang Artillery Battalion 344 cu an la ih, can reilo te sung cu an thunun man, asinan ralhrang tlunzuang raldo vanzam pawl in nasate ih an donak ruangah dung an sip sal hnu,a famkim zetmi nehnak ngah theinak dingah an do rero lai, tiah ralram thuthang hram cun an rel.
AA le a ṭangrualpipawl hin May 9 ihsikhan Rakhine Ramkulh, Gwa-Nga Thaing Chaung lamzinpi,kap ih မြောက်စမ်း khua kiangih um ralhrang Artillery Battalion (344) cu an rak do thawk, cutin ralhrang outpost pawl cu an lakfel theh hnu, May 15 zingpit ahkhan ralhrang Artillery Battalion (344) sungtiang an rak lut thei zo ti asi.
Cutin, ralhrang Artillery Battalion (344) cu lakfel asizo tiah Khawpi sung ah cun an rel celcel ih, Ralhrang sungtel pawl ih sungkua pawl cu khawleng an suak thei nawn lonak khal a rei thlang ti asi.
Hi ralhrang Artillery Battalion (344) do thawk asini ihsin ralhrang hotulu pawl ih nupi pawl cu Yangon le ဟင်္သာတ lam ah an tlan ti asi.
Cule May 14 ni kha cu kaphnih doawknak a nasa zet, ralhrang tlunzuang raldo vanzam in zan ihsin a thaizing lam tiangah bomb a thlak zanvar asi tiah tualsung thuthang hram cun an rel.
Cule tuahhin ralhrang Artillery Battalion (344) hleiah, Ye Kyi peng thawn a pehzawmawmi လေးမျက်နှာ peng sung khalah AA le a tangrualpipawl cun ralhrang sakhan pawl cu an do rero lai thu le ruahsur rero lai can khal ah ralhrang cun tlunzuang raldo vanzam hmangin nasaten a do thu theih asi.
Cuihsin, AA le atangrualpipawl hin tufangah Magway ramthen, ငဖဲ peng sungih ralhrang နတ်ရေကန် Strategy, Bago ramthen ah ပန်းတောင်း pengsungih ralhrang defences ralthuam tuahnak cetzung No, 16 tipawl ah cun dothlengnak an fehpi rero laifang asi thu pawl khal theih asi.
