Chin ramkulh, Kanpalet khawpi lampan ih hmunramnawr ralhrang pawl cu dothlengtu tangrual pawl ih rak dokirnak zarah ralhrangpawl cu an dinhmun a tha lo zet ih, dung an sip sal ti asi.
Ralhrang council cun Yaw hmunram ihsin Chin ramkulh, Kanpalet khawpi lam pan in May 16 ihsi khan hmunram a nawr thawk lala hnu Chin dothlengtu tangrualpawl ih dokirnak zarah hmunramnawr ralhrang pawl cu dung an sip sal veten Chin ramkulh sungih ralhrangin a lak hrihlo mi khawpi pawl ah cun duhthawh iarten bomb a thlak ciamco ti asi.
Cun Magway ramthen, Yaw hmunram le Chin ram ih an pehawk ruangah ralhrang council cun Saw-Kanpalet zinpitluan le Kyaukthu-Mindat zinpitluan tipawl cu zawh in hmunhnih ah a rual in hmunram a nawr thawk ruangah Kanpalet ramrii lam ah doawknak khal a nasa zet asi.
Cule tuahhin Kyaukthu-Mindat zinpitluan zawhih hmunramnawr ralhrang pawl hin Mindat khawpi cu thunun an tum ruangah doawknak khal a nasa sinsin thei lai asi tiah dothlengtupawl lam cun an rel.
Tuahhin kaphnih buainak cu a nasat tuk ruangah mipipawl ralthuam in siseh thlacamnak in siseh, in rak bawm hram uh tiah Chin People’s Army-CPA thuphuangtu Salai Yawman cun dilnak a neih thu le ralhrang tlunzuang raldo vanzam donak ihsin an him theinak dingah ralring teih um ding khal in tualsungmipawl hnen thucahnak khal a nei cih.
Cule tufangahhin Chin ram thlanglam Yaw hmunram le ပုံတောင်ပုံညာ lamah hmunramnawr ralhrang thazang 1000 lai thawn an doaw rero thu le kaphnih doawknak ni 10 a ti zo ti asi.
CPU hmunram a simi Mindat, Matupi, Kanpalet khawpi pawl ahcun tualsungmipi siseh, ralkap lam ah siseh, ralhrang hin cawl lo rorin tlunzuang raldo vanzam pawl hmangin a dodan ahhin leilam doawknak ziangtluk a sosang ti cu a theihtheih mei.
Tuahhin hmunramnawr ralhrang pawl cu hmainawr thei lawn kan kham thei ko nan ralhrang council hin ralhrang thazang 1000 lai kuatbet sal dingah timtuahnak an neih ruangah doawknak cu a rei in tuhnak in a nasat zet khal zum asi tiah Salai Yawman cun a rel thu khal theih asi.
Cuihsin tuih dinhmun ah hrih hi cun tualsungmipi pawl hmunkhat ah punkhawmnak pawl nei lo dingah le leikhur lai dingah siseh, ralhrang drone le ralhrang tlunzuang raldo vanzam tipawl lakihsin an him theinak dingah ralring zetih um ringring dingah tualsungmipi pawl cu Chin People’s Organization /Chin People’s Army khalin theihternak an neih thu pawl khal theih asi.
