Mandalay ramthen, မဟာအောင်မြေ pengsungah Social Welfare Association ih mino 19 pawl cu ralhrangin an firhloh thu theih asi.
မဟာအောင်မြေ pengsungih 86 zin le 87 zin karlak, zin 40 le 41 karlakih တောင်ခွင်မင်းကြီးတိုက် ၊ ရှမ်းပွဲဇေတဝန် tlawng kiangih ong mi Helping Hands Social Assistance Association ih um mino 19 pawl cu ralhrang thazang 10 rual in May 8 zan nazi 11:30 hrawngah khan luhcilh ih an va thiar hloh thu le an mani tiangah an thuhla theih ding a um hrih lo thu pawl theih asi.
Cule May 10 zanlam azi 1:30 hrawng khalahkhan မဟာအောင်မြေ pengsung thotho ah ralhrang pawl cu Mark2 mawtaw 2 thawn workshop dawr ah an lut ih kum 32 hrawngih upa mipa 1 khal an kaiih an hruai tiah theih asi.
Cuihsin ralhrang pawl hin Mandalay khawpi sungih fifir, riit-sii tham, misual tipawl cu sumpai hmangin an lem ih Pyu Saw Htee ah an can thu le zarhkhat sungah ralhrang tuanding minung 400 ihsin 600 karlak hawl hmu tengteng dingah khawpi sungih mino pawl cu hruaihlo dingah le mino pakhat ah sumpai ting2 an pek dingthu in ralhrang cun an fial thu pawl khal theih asi.
Cutin ralhrang pawlih fialmi pawl cun tualsungah mino pawl cu an hmuhnak hmun pohpoh ah an kaih hleiah, tualsungmipi cennak inn sungtiangah lut in an kaiih ralhrang pawl kutah an pe theu tiah theih asi.
