Karen National Union (KNU) Myeik-Tawei District (Brigade 4) area sungih cangvai theu KTLA (Kaw Thu Le Army) ဆာ့ကဆော Unit ih mipum 37 pawl cu an ralthuam famkim thawn May 4 zanlam ahkhan KNLA hnenah an ap-awk kirsal thu theih asi.
Hi mipum 37 KNLA hnenih kirsal pawl hi ထားဝယ်ခီး (ထီးခီး) lamih KTLA Battalion (2) base ih um an siih, Battalion Commander ဖိုအယ့် ih hoha mi an siih, cutin an company hotu pakhat le company hotu deputy 2 tipawl telin mipum 37 an si thu theih asi.
Cun hithuthawn pehparin Myeik-Dawei District Secretary Padoh Saw Ee Na le KNLA Battalion (27) Commander Lieutenant Colonel Saw Moo Gay cun thudik asithu an nemhnget thu le lungawisopar ten an rak lawmluh thu le an tuanvo ding pawl khal pe dingin hmalaknak an neihthu pawl khal theih asi.
Cule Myeik-Dawei district ahhin KNLA le KTLA pawl hi kaphnih buainak le baihawknak an nei phahphah theu ih, kan dungthla April 22 ni khalahkhan KTLA lamin a thuple ralih an rak donak ruangah KNLA ralkap 4 le nauhak 1 in an nunnak a rak liam dah zo thu pawl khal theih asi.
