Mandalay ramthen, Maha Aung Myay peng Seinpan veng ihsin Shane ramkulh, Taunggyi khawpi ah inn sak ding a um tiih an kawhmi ပန်းရံ saya le a kuthnuai hnatuan mi 11 pawl cu bummi an si thu le tuahhin an umnak hmunram theih ban a siloh thu an sungte pawl in Media fehtlangin hawlbawm dingah an ngen thu pawl theih asi.
May 20 zinglam nazi 10 hrawngahkhan Maha Aung Myay peng Seinpan veng 305 ih um ပန်းရံ saya ဦးမြင့် le a kuthnuai hnatuan mino mipum 11 pawl cu inn sak ding a um tiah Taunggyi ihsin Aye Tharyar khawpi ah Light truck mawtaw 1 in an phurih an hruai ti asi.
Cutiih an hruaihnu May 20 zanlam ihsin an sungkua pawl hin phone hmangih an pehtlaih theinawn lo leveten Online Media pawl ah a ranglamin run thlah sal uh tiah ngennak an neih hnu, May 25 ahkhan ပန်းရံ saya ဦးမြင့် telin kum upa cin mi 6 cu an suahsal, an hruaihlohmi pawl hi kum 18 ihsin kum 35 karlak mi an si thu le an hruaihlohmi mino 5 pawl cu manitiangah khan an thuhla theih ding a um hrih lo ti asi.
Tufanghi ralhrang council hin ramsung hmuntin deuhthawah ralhrangtuanding mithar a ruk ding le kaih ding a hawl rero laifang a siruangah hi thilthleng khal hi ralhrang council cangvaihnak a si tiah zingzawitu pawl cun an rel thu pawl khal theih asi.
