Chin Ramkulh ih Falam-Hakha lamzinpi ah hmunramnar ralhrang pawl le Chin People’s Defence Forces tangrual pawl karlak doawknak nasa zet a um ti a si, cule hmunramnawr ralhrang pawl cun Thlanrawn khuathar le Thlanrawn khuahlun ih tuangsung mipi cennak inn pawl an nawk ti asi.
Tualsungmi pakhat cun kan khua sungih inn pawl cu an kang theh deuh thaw asi, Falam khawpi ih doawknak ruangah Falam tualsungmi thenkhat cun an neihmi hlawn thilri pawl cu kan khuaah hin an ra ret theh ih, hmunramnawr ralhrang pawl cu Lungrang khua an thleng ti kan theih rual le kan khuasen in loram lam pan in kan tlan theh ih hmunramnawr ralhrang pawlin kan khua an lan hnu ah kan khuaah kan lut sal ding tiah ruahmannak kan rak nei tiah a rel thu le tu ahhin khuasung kan luhthei nawnlonak hi ni 3 a kim zo ih, zankhat lawng beudingih khua suahsan kan siruangah tuahhin ei ding le in ding lamah harnak kan tawng ih, a rei vivo cun kan harhdamnak lam khal a hngong ban thei asi tiah riahse zet phah cingten a rel thu pawl theih asi.
Cule ralhrang in kum 2022 Septembar thla khalahkhan Thlanrawn khuaih tualsungmipi cennak inn a malbik ah inn 10 cu an rak urkang sak dah zo ti asi. Thlanrawn khua hi inn 80 ihsin 90 kiangkap hrawng umnak khua pakhat siin, tuihtum hmunramnawr ralhrang pawl kut thak umih ngaihnak theilo lal le sualhrawt pawl cun an urkang sakbetnak ruangah a khuasen in a kang theh deuhthaw tiah theih asi.
