Ralhrang in Falam khawpi ah a tualsungmi pawl nan um sal thei zo tiah an than nan, Kalay – Falam zintluan ih ralhrang check gate pawl in sumpai an ngen tamtuk ruangah Falam tualsungmipi pawl kir thei lon harnak an tong tiah theih asi.
Kalay ihsin Chin ram sonak zintluan ih ralhrang check gate pawl cu Tawngphila le Peng 9 (၉ မိုင်) karlakah hin ralhrang check gate 5 rori a um ti asi.
Cuih ralhrang check gate pawl cu Tawngphila, Peng 8 University Gate, Khaikam palik zung gate, Khaikam siahpeknak gate le Peng 9 မစက gate tipawl an siih, cutin ralhrang pawl cun mawtaw sukso pawl hnen ihsin sumpai tam zetzet an ngiar theu tiah theih asi.
Hithuthawn pehpar-in Falam tualsungmi pakhat cun kan inn le lo umnak le kan khualeram asivekin Falam ih tlun cu an duh zet, amahlawngte ralhrang check gate pawl hin mawtaw (Pajero) pakhat ah hin ting 30 lai an ngiar ruangah zoso tlung thei nawn ding, gate thenkhat ih ralhrang pawl inle mipi an biakdan tih a nung thei tuk hleiah, sekha taktak ih an ti theuruangah ziangtluk in Falam tlun kan duh a sihman ah kan tlung thei lo asi tiah a rel thu theih asi.
Cule ralhrang hin thilri phur mawtawpi pawl phei cu ting 80 ihsin ting 100 karlak tiang an dil thu pawl khal theih asi.
Cuihsin tuhrihah cun Falam khawpi ih tlung duh pawl cu nan tlung thei zo tiih ralhrang in thu an than miah Kalay-Tedim zin pawl ah doawknak pawl tuletu a um ruangah mipi pawl hrangah sukso vahnak a him hrih lo tiah theih asi.
Cule mani May 11 ahkhan Falam le Hakha peng ritawknak ih um Dokthek khua kiangah hmunramnawr ralhrang pawl le Chin ram dothlengtu pawl cu an doawk sal thu le hi hmunramnawr ralhrang pawl hi May 10 ahkhan Ramthlo khua an thlen hnu, mani May 11 ahkhan Dokthek khua an thleng tiah theih asi.
Cule hmunramnawr ralhrang pawl hin drones hmangin Dokthek khua cu bomb an thlaknak ruanga tualsung mipi cennak inn pawl a siatsuah thu le tualsungmipi thi le hriamtuar an um le umlo cu theihfiang asihrih lo tiah theih asi.
