Arakan Army (AA) Commander-in-Chief, Maj. Gen. Htun Myat Naing cun The Diplomat News Agency thawn interview an neihnakah SAC ralhrang in tualsungmi pawl tlunzuang raldo vanzam hmangih bomb a thlak sung cu ziangtik hmanah remdaihnak timi thu relkhawmnak cu a cang suak dah lo tiah a ti.
Tualsungmipi pawlih sahimnak hi Arakan Army (AA) ih ret thupi bikmi asiih, tualsungmipi pawl kilhim theinak ding hrangah a dikmi lamzin pawl cu kan hawlih, International community pawl thawn khal tuantlangnak pawl kan nei rero ko nan tuhrih ah cun kan hlawhtling hrih lo tiah a rel.
Cule Gen. Htun Myat Naing cun milai khat le khat lainatawknak hrangih a poimawh bikmi le a tumbikmi thuhla asiruangah ralhrang in tualsungmipi pawl bomb a thlak ringring sungah hicun kan nih cun ramkhel thuhla ah SAC ralhrang thawn relkhawmnak neih ding cu a har zet lai ding asi tiah a rel thu khal theih asi.
Cun tuahhin SAC ralhrang council cun thathnemnak thawn biakawk an duh thu ah Gen. Htun Myat Naing cun an nih ih nawrnak pawl ruangah dung kan sip in kan pe aw lamlam lo ding tiah fiangzet in a rel thu khal theih asi.
Cule SAC ralhrang council cun thil diklo zet ih phutnak an tuah rero ai cun, a takram ih thilthleng cu zoh in kan zate hrangih a dikmi relkhawmnak pawl cu ruat sawn seh tiah a rel bet.
Cuhleiah Tuluk ram in doawknak cawldingih a nawrnak thuthawn pehpar in Gen. Htun Myat Naing cun nawrnak silo in Tuluk cun an hlawknakding ih an sumdawnnak pawl cu kilhim an duhnak le Myanmar ramcu dai seh ti an duhnak asi tiah a rel thu pawl khal theih asi.
