US ralkap ih ralbawi hotu sangbik asimi, General Dan Caine, Joint Chiefs of Staff cun Iran thawn buainak a um rero lai thuhla ah a thupizetmi ralrin peknak a nei ti asi.
Ralbawi Caine cun atu ih kahcawlhnak hi kumkhua kahcawlhnak a si lo, “can tawite sung hranglawngih cawlh a si,” a ti ih, US ralkappawl cu ziangtik lai can khalah baihpithlaknak tumthamzet cu tuan sal dingah an tiar aw cia zo asi tiah a ti.
Thuthang latu pawl thawn tonkhawmawknak an neihnak khalah, US ih thinsaunak cu an caklonak tiih ruat lo dingah a sim thu le thupek an dawng a si ahcun a hlan ih kan rak tuah ṭheu vekin zamrang zetin le dik zetin kan kapsal thei a si tiah a rel thu khal theih asi.
Cule a khatlamah, Hormuz Tifinriat ahcun buainak a sosang sinsin ih, thiril phur lawngpi pawl cu kilhimnak an neih rero laiah Iran in drones, missile pawl le a rangzetmi ralo lawngpawl hmangin a do thu pawl khal theih asi.
Cun US Central Command (CENTCOM) ih thuthanmi vek a sile, Iran ralkap lawng 6 pawl cu an siatsuah sak theh thu an phuang.
Cule Hormuz Tifinriat hi tipi zin poimawh zet asivekin, leitlunih Oil zatek 20 hrawng phurhsuaknak tipi a siruangah a ramkulh kilhimnak hi leitlun huap sumdawnnak hrangah a thupi zetmi a si thu khal theih asi.
Tu ih kahcawlhnak hi a nem zetmi ngilneihnak asiih, thil umdan a remcang lo asile, doawknak a pehzom sal ding tiah zohhliahtu pawl cun an rel thu pawlkhal theih asi.
